Monseigneur, vous ayant escrit du douziesme de ce moys par home exprez

craignant que quelque desastre ne soit survenu au messager, je ey

encor depesché ce present porteur pour vous suplier très humblement

vouloir comander au tresorier qu’il m’acomode de fasson que je puysse

recouvrer largent du payement de ma compaignie de ce moys au

[barré : Montel]

Montelliemar pour n’encourir tant de dangers, qu’il y pourroit avoir

antrecy et Vallence et cepandant monseigneur, quil vous playse

comander à celuy qui tient la ferme du roy an ceste ville et aux fermiers

de Montouban et Mevillon que largent de quoy ilz se trouveront

redevables à sadite magesté ilz ayent à le fournir antre lez mains de

monsieur de Monguers jusquez à ce que par vostre moyen ilz recouvrent

leurs acquitz du tresorier, soit pour le passé ou pour le terme de Paquez

prochainement venant, que pourra monter le tout à la somme de huict centz

livrez, autrement je ne scay où prandre lez deniers de mondit payement

sinon par les moyens qu’ils vous plairra m’ordonner. Despuis ma dernière

letre escrite tout ce que monsieur de Montbrun a peu tirer de ses

cartiers et de la Provence a passé prenantz le chemin de Valentinois,

Seguiran, Ferrier, le cappitaine Bragnart de Vaulpierre, et tout ce quilz

ont peu ramassé, menassantz fort le Crest. Le sieur de Montbrun

Royssez, Vercoyran, Le Mas, St Auban, et lez damez an lethiere partirent

dimanche aprez disner de Nyons pour aller conduyre la femme de Royssez

à son mesnage à Rouynat. Je ney peu scavoir qui est demeuré à Nyhons

pour y comander. Il y a troys jours que javoys fet partir ce porteur mez

les pluyez continuellez et le desbordement l’ont retardé au rivieres.

Atandant son retour et la provision quil vous plairra m’ordonner,

je prierey le Createur vous donner,

monseigneur, an parfete santé très longue et très heureuse vie. Du Buys,

ce XVIe jour de mars 1574.

Vostre très humble et

Très obeissant serviteur

A de Saint Auban

Consultation